वॉटर प्युरिफायर - समज, गैरसमज accuman water purifier lanja

वॉटर प्युरिफायर संदर्भात आजकाल वर्तमानपत्रात, टि.व्ही.वर,नेटवर अनेक जाहिराती दिसत आहेत. तसेच वॉटर प्युरिफायरचे समर्थन करणार्‍या बातम्या व विरोध करणाऱ्या बातम्या सुद्धा आढळत आहेत. सामान्य माणसाला संभ्रम निर्माण होईल असे वातावरण दिसत आहे. म्हणूनच काहीतरी लिहावे असे वाटले. खरं तर बहुतांशी आजार हे अशुद्ध पाणी पिण्यामूळेच होतात हे खरे आहे. पण पाणी शुद्ध करताना त्यातील अशुद्धतेबरोबर आवश्यक घटक नष्ट होणार नाहीत याची काळजी घ्यायला हवी.

आजकाल आर. ओ. वॉटर प्युरिफायरचे फॅड आले आहे. पण आर. ओ. म्हणजे नेमके काय हे ग्राहकाला सोडाच, पण विक्रेत्यालाही धड सांगता येत नाही. जिथे अति खोल बोअरवेलच्या पाण्याचा पिण्यासाठी वापर केला जातो, फक्त तिथेच आर. ओ. वॉटर प्युरिफायरची आवश्यकता असते. अशा पाण्यामध्ये एकूण विरघळलेल्या क्षारांचे (TDS) प्रमाण अतिरिक्त असल्यास ते योग्य प्रमाणात ठेवण्यासाठी आर. ओ. वॉटर प्युरिफायरचा उपयोग केला जाऊ शकतो.काही सेटिंग्ज त्यामध्ये असतात त्या योग्य रितीने हाताळणे देखील आवश्यक आहे. आर. ओ. म्हणजे रिव्हर्स अॉसमॉसिस. यामध्ये उपलब्ध पाण्यातील क्षार कमी करण्याची सोय असते. पण मूळातच जर तुम्ही कमी खोल विहिरीचे किंवा नदीचे पाणी पिण्यासाठी वापरत असाल तर त्यामध्ये क्षारांचे प्रमाण कमी असते. असे पाणी शुद्ध करण्यासाठी आर. ओ. वॉटर प्युरिफायरचा वापर केल्यास कमी असलेल्या क्षारांचे प्रमाण आणखीनच म्हणजे आवश्यकतेपेक्षा सुद्धा कमी होते,हे आरोग्यदायी ठरत नाही. जिथे मूळातच पाण्यामध्ये क्षारांचे प्रमाण कमी आहे तिथे शुद्धीकरणासाठी यु. व्ही. (अल्ट्रा व्हॉयलेट) किंवा यु. एफ. (अल्ट्रा फिल्टर) वॉटर प्युरिफायर वापरणे योग्य ठरते. हे प्रकार पाण्यातील क्षारांचे प्रमाण कायम ठेवून शुद्धीकरण करतात. क्वचित काही ठिकाणी अगदी बोअरवेलच्या पाण्यामध्ये देखील क्षारांचे प्रमाण मध्यम आढळते, तिथे देखील यु. व्ही. आणि यु. एफ. वॉटर प्युरिफायरचा उपयोग शुद्धीकरणासाठी केला जाऊ शकतो.

आपण आपल्या कडील उपलब्ध पाण्यातील क्षारांचे प्रमाण TDS METER द्वारे तपासून घेऊ शकतो. बर्‍याच ठिकाणी हे उपकरण उपलब्ध आहे. व या तपासणी नंतर नक्की कोणता वॉटर प्युरिफायर घ्यायचा हे ठरवू शकतो. थोडक्यात वॉटर प्युरिफायरचा वापर धोकादायक असूच शकत नाही, मात्र वॉटर प्युरिफायरची आवश्यकतेनुसार योग्य निवड करणे महत्त्वाचे आहे. चुकीची निवड आरोग्यास अपायकारक ठरू शकते. 

टिप:

सध्या आपल्या कोकणातल्या लांज्यासारख्या तालुक्यात (जिथे औद्योगिकीकरणामूळे होणारे जलप्रदूषण फारसे नाही तसेच समुद्र देखील फार जवळ नाही, आणि सुदैवाने क्षारांचे प्रमाण देखील काही अपवाद वगळता अतिरिक्त नाही) नक्कीच बहुतांश ठिकाणी आर. ओ. ऐवजी यु. व्ही. किंवा यु. एफ. वॉटर प्युरिफायरचा वापर करणे हितावह आहे. आर.ओ.पेक्षा यु. व्ही.चा व यु. व्ही. पेक्षा यु. एफ. चा देखभाल खर्च तुलनेने कमी येतो.